قصة باللهجة البحرانية.. خديجة وقصة حب

ما عيه سامحوني الي كانوا يقرونها في منتديات شهد البحرين بس يلا كتبتها من جديد .

وان شاء الله ما يصير الا خاطركم طيب

قصة بحرانيه.. بعنوان.. (( حياة خديجه))

كانت خديجه بنوته صغيره حبوبه وحليووه.. حياتها كانت حليوه وبسيطة طبعاً كتكوته كانت تعيش حياه مليئة بالهدووء .. اللي خلاني اقول ان حياتها كانت مملؤه بالهدوء هو هدوئها الغير طبيعي طبعاً بالمدرسة.. وخلوني أبدأ وياكم قصتي..
طبعاً .. راح أبدأ وياكم القصه من عمر 5 سنين ورايح..
كانت تحب البرجر.. والبيتزا والشبس والمينوو هالخرابيط من يوم وهي كانت نتفه.. عاااد يوم من الايام شوفوا شلون طاحت فيها.. شفتون احد نفس هبالتها.. ؟؟ مااعتقد بس خلونا نشوف القصه وانتون احكموا
خديجه: أمااااااااه ويش الغداء اليوووووم؟؟
أمي: الغذاء اليوم سمج .. خليني اطبخ الحين ابوش بيجي وبيطحن عليي للحين مااستوى الغداء قال للحين مااستوى.. والله بلشه ويا هالرجال..
خديجه: اهاا سمممج.. ياربي..!! ((الاول عاد نقبل بالسمج مساكين احنا جهالوا منتفين يقصون علينا بس الحين نطنقر لان كل يوم يقولون لينا سمج مللونا كل يوم سمج))
أمي: يالله خديجووه الغذاء جاهز نادي اخواتش واخوانش وابوش.. عشان يتغذوون..
خديجه: يالله قوموا اتغدوا جهز الغداء يالله.. اللي مابيجي كيفه اني بروح لاتقولون ماناديتكم هاااااا
معصومه: الغداء شكله احلوووو اليوم .. ويلي جوعانه حد امي
أمي: اكلوا وانتون ساكتين وينا ابوكم؟؟ يوو ياللي ماتستحون حتى ماناديتون له.. الحين بيعصب قومي انتين خديجوه نادي ابوش
خديجه: ياعليييييييي يعني كلا اني؟؟ كلا اني؟؟ ((مسكينه اني جاهله وقاصين عليي))
خديجه وهي رايحه الى ابوها: أبويااااا اقعد ابوياااا الغداء استووى
ابويي: جان بعد مااستوى يوم جت الظهر قالت استوى هادي قبل مااراويها انا ام النسوان تقعد تسولف ليي وياهم الى الظهر واخر شي تسويه لينا هالحزه اراويها انا
امي: وينك حج علي تعال استوى له جم مره ينادونك
ابويي: أنا قبل ماافشلش قدام هالنسوان مايفيد فيش.. كلا تأخرينا لكن خلني الحق عليهم بفشلش قدامهم
امي: والله مستوي من زمان بس انته قاعد ليي فوق نايم
معصومه: ويش الحين وياكم نتغدى لو بتتهاوشون لينا هااااااه؟؟
امي: يالله انجبي انتين بعد يا ام لسان اتغدي وانتين ساكته
خديجه: ياعلييييييي ماني قادررره .. ماني قادره
ابويي: ويش فييييييش خديجوووووووه؟؟
امي: يوووووو بتموت بتي بتمووووووت خساره
معصومه: ياعلي هكو يطلع منها دم.. لحقوا على بتكم
ابويي: قومي انتين يا حظي شيلي بتش بنوديها المستشفى
امي: ويلي على بتي جان ماتروح عليي خساره
معصومه: الله يستر من هوشتكم له..(( في خاطري: لكن تستاهلون))
خديجه: ياعلييييي امااااااااه يعورني يعوورني لحقي عليي بموت ماني قادره
امي: بس سكتي بنوصل الحين المستشفى ويلي عليش يا بتي
وبعد ربع ساعه من الووقت وصلنا المستشفى...

طبعاً ماراح أكمل الجزء الثاني الا اذا شفت هناك تفاعل ويا القصه..




تحياتي
ملاك النور

اوكيك راح احط البارت الثاني يلا جهزوا روحكم

هع بس الله يخليكم الي عجبتهم القصة يحطون التصويت اوكي
تفضلوا ... اقرئوها بالاستمتاع والوقت المتمتع

((الجزء الثاني))
المستشفى.. الدكتور: ويش فيها خديجة..؟؟
الوالد: مادري ياخوك.. بس كنا نتغدى مانشوف الا وحده تبالع لينا ويش فيش خديجوه الا تصرخ وماقدرت تتحجى.. بيني وبينك السمج كبار يعني مادري هي بلعت سلايه شكلها
الدكتور: اوكي مو مشكله الحين بشوف وياها الاشعة وبيطلع لينا كل شي..
الام: ويش يعني .. بتي زينه؟؟ طمني عليها دختوور..
الدكتور: مافيها ان شاءالله الا العافيه اطمني حاجية..
وبعد ثلث ساااعة من الأشعة.. مسكينه يا خدووج بالعه ليش سلايه؟؟ والله ماتسووى عليش كلا من طحنت امش وابوش..
الدكتور ويا الدكتوره: ويش بشري؟؟
الدكتوره: فيها سلاية وعوده بعد.. مسكينه يبي ليها عملية.. ماتستاهل والله جاهله توها..
الدكتور: امممممممم.. خلاص بنعطيهم موعد عشان العملية((خبركم المواعيد بالبحرين عقب سنه لما الواحد تلووع جبده))
الدكتور: تفضل يا أبو خديجة هذا الموعد ولاتتأخرون عشان العملية..
الوالد: خيير بس مافي وقت اقرب له؟؟ لان مابتقدر تتكلم ولا تاكل يعني المفروض هالأسبووع.. ويش ناوين على بتي تموت
الدكتور: بشوف أنا وبجيك أقرب موعد بس ما أعتقد أقل من أسبوع يعني..
بعد محاوولات ولووعة الجببببببد.. قرروا يعطونا مووعد بعد أسبووع .. حشى ماصارت دي صدق مواعيدهم نفس وجوههم.. والله حاله
الدكتور: حصلت ليك حجي موعد قريب الأسبوع الجاي يوم الاثنين مافي أقرب من جديه
الوالد: خير مابغيتوون تعطونا مووعد قريب.. لوو من صوبكم أحد عطيتونه عادي بس احنه الفقاره قاصين علينا..(( مو كأنه دشينا بالسياسه؟؟))
وبعد 3 ساعات بالمستشفى ولووعة الجبد.. وصلنا البيت أني وأمي وأبويي.. وفي إستقبالنا معصووومه وياها اختي الصغيره فطاموه وأخويي محمد..
معصومه: ويش أماااه..؟؟ ويش أبويااااا؟؟ ويش قالوا فيها خديجوه ام العصي؟؟
الوالد: بالعه سلايه الملهوفه الحين هي ماتقدر تتحجى الى الاسبوع الجاي يوم الاثنين عمليتها..
الأم: ايي كلا من طحنتك يا الطحان ماتسكت انت حزه غداء الشيطان حاضر تقعد تهاوش لينا .. ((أماااه سكتي انتين السبب كفايه متأخره وانتين تسوين الغده صدق نحيسه))
الوالد: يالله راسي يعورني بروح انام انا.. اللي بيطلع صوت راحت عليه مني .. وانتين انتبهي الى اولادش اللي يطلع صوت انتين المسئوله عنهم.. يالله..
معصومه: ويش فيش خديجه؟؟ اتكلمي قولي معصومه؟؟
خديجه: مم مم ماف اكم.. ((مسكينه سكتي فشلتينا ويا هالحجي هههههههه))
معصومه: يوووو اختي اضحكين ريريش كله طلع ههههههههههه ياعلي صرتين اخس من الجهالوا.. مسكينه اختي
خديجه: في خاطرها ((خلني لكن اصحى بتشوفين يا ام كشه تطنزين عليي ها اراويش)).. ويش ليي آكل سمج صدق دعله اني
طبعاً وبعد معاناة خدوج مسكييينه .. والريري طايح 24 ساعه مسكينه ماتسوي عليها هالسلايه قررررب المووعد.. يالله خدوج اجهزي بيشيلون منش هالعله.. ههههههههههه
الأم: أسمع حج علي.. اني مابقدر اروح ويا خديجة اترقد لان فاطمه عندي توها صغيره جيفا اخليها ويا معصومه.. ومعصومه مي فالحه في شي؟؟ مابتقدر عليها
الوالد: يعني منهو بيرقد ويا خديجه؟؟ بتخلينها بروحها مايصير توها 5 سنين ((مسكينه خدوج واعليا))
الأم: لا بخلي تروح وياها معصومه ام الدواهي.. مابتقول شي اني اعرفها..
الوالد: شوفي بتش يمكن ماترضى.. روحي سأليها يالله سرعي باجر موعدها له
الأم: انزييين هداني بغدي ليهاااااااا.. ((ههههههههههههههههههه صدق بحرانيه))
الأم: وينش عصوووم.. معصومووه وصمخ جلاب قولي آميين..
معصومه: وييش امااه؟؟ ويش تبين لاتقولين انشر الثياب لاعت جبدي
الأم: لا باجر نبيش تروحين ويا اختش المستشفى عشان تنامين وياها هناك عن بروحها اني مااقدر اروح ويا اختش..
معصومه: ويلييييييييييي صدق؟؟ لو تشلخين حلفي حلفي؟؟ ويلي كشخه ياعلي عجيييييييب.. ((صدق مصرقعة هالابنيه))
الأم: انزين روحي نامي له باجر بتروحين ويا اختش المستشفى
معصومه: إن شااءالله بروح انااام يالله تصبحين على ليل..
نسيت أقول ليكم معلومه.. معصوومه في ثاني إعدادي اتخيلوا انها توها وبترقد ويا اختها؟؟ تعرف تتصرف .. الله يستر بس..

تحياتي
ملاك النور

[img][/img] هههههههههههههههههه
تسلمين خيو وايد روعة حلووووةةةةة
مشكورة خيو ((حنين ))
اني اشكرش على دي الرواية حلووة اتمنى الكثير والله تعبير حلوووة وايد حلوووة